Blog 20.06.2022
«I na va betg per relaschar persunas, mabain da delegar lavurs nunproductivas a maschinas.»
Tge vesas ti sco la pli gronda sfida en connex cun la digitalisaziun?
«Superar pregiudizis è per mai ina da las pli grondas sfidas. Spezialmain en la gastronomia hai anc adina temas che maschinas pudessan remplazzar collavuraturas e collavuraturs. Nus vesain quai auter. Per exempel ils robots da servetsch: La reacziun tipica è savens: "Jeu na vul betg remplazzar mes persunal da servetsch cun robots. Il giast vul esser servì da persunas!" Ma quai n’è betg il punct. Il robot surprenda il transport da rauba repetitiv. Quai dat al persunal da servetsch dapli temp per s’occupar dals giasts, uschia pon ins servir meglier e schizunt vender dapli.»
Vesas ti pia la digitalisaziun sco schanza?
«Cleramain. Ella sustegna la gastronomia e l’hotellaria da lavurar cun damain persunal u da crear dapli temp liber per s’occupaziun individuala dals giasts e finalmain vender dapli. Quai è spezialmain impurtant pervi dal manco da persunal actual. Las lavurs che prendan bler temp na ston betg pli vegnir fatgas manualmain. Quai sa ves’ins per exempel cun ils robots da servetsch. Quai vala dentant er per auters process sco reservaziuns, pajaments u la contabilitad da cassa. L’idea n’è betg da relaschar persunas, mabain d’automatisar u delegar lavurs nunproductivas.»
Tge irritescha ti spezialmain vi da la transformaziun digitala?
«Durant la pandemia hai jau survegnì quasi mintga emna telefonadas dad insatgi che vuleva vender in’applicaziun che avess da schliar tut ils problems. Spezialmain en il turissem han blers la persvasiun ch’els ston sviluppar soluziuns per lur problems sez. Jau sun da l’avis: Las soluziuns èn gia avant maun. I va plitost per colliar elegantamain las soluziuns existentas, e quai ensemen cun concurrentas e concurrents che han savens las medemas sfidas. Qua spetg jau midadas grazia a GRdigital.»
Tge fa GastroGraubünden concretamain per preparar ils collavuraturs per la transformaziun digitala?
«Nus dain a noss commembers ina vasta purschida da curs da furmaziun supplementara e seminaris. Quels pertutgan savens betg directamain la transformaziun digitala, mabain preparan ils participants da prender part sin quest viadi digital. Per exempel cun curs davart social media, paginas-web u preschientschas digitalas en general. Quels purschins nus en noss center da scolaziun a Cuira u online. Plinavant tematisain nus regularmain temas digitals en noss Gastro-Journal ed en il newsletter per crear sensibilitad.»
Co ha la pandemia influenzà la digitalisaziun en la gastronomia?
«Blers manaschis han duvrà il temp da la pandemia per avanzar digitalmain. Las empustaziuns online ed era las pussaivladads da pajament electronic han fatg grond progress. Er cartas da menu digitalas cun funcziuns directas da far empustaziuns u da pajar vegnan duvradas pli savens. Las reservaziuns da maisas online èn s’augmentadas da circa 40 manaschis a bunamain 180. Uschia pon las "no-shows" vegnir reducidas fermamain e las maisas vegnan utilisadas pliras giadas.»
Davart Marc Tischhauser
Dapi il 2017 è Marc Tischhauser directur da GastroGraubünden, l’associaziun da patruns per hotellaria e gastronomia en il Grischun. El è responsabel per il svilup e la nova posiziun da la scola professiunala d’hotellaria e gastronomia, per promover projects per giuvenils e per meglierar las cundiziuns generalas per la branscha en il Grischun. El ha studegià scienzas economicas a Turitg ed ha lavurà en funcziuns diversas en il turissem, en il svilup regiunal ed en la cussegliaziun strategica en il context turistic.