Communicaziuns 08.09.2022
L’emprima dumonda cun ina decisiun da promoziun positiva
L’academia online per la branscha turistica sa drizza al persunal, a possessuras ed a possessurs resp. a manadras e manaders dad interpresas pitschnas e mesaunas en il chantun Grischun activas sin il sectur turistic u en branschas colliadas cun il turissem. Ella vul sustegnair la transfurmaziun digitala en la hotellaria e la gastronomia e sin il champ dad occurrenzas e d’autras purschidas turisticas, ma era l’agricultura ed il commerzi che vulan vender lur products locals. Il coc da questa plattafurma da perfecziunament èn 80 medias per emprender a moda autodidactica. Igl è la finamira da render accessibla gratuitamain la purschida a las persunas interessadas. Il project pilot è preventivà cun 63 000 francs. Cun il project da pilot duai vegnir elavurà in Proof of Concept / MVP (duas unitads d’emprender digitalas ed in prototip dal portal). Plinavant visualisescha il MVP l’idea dal project en il context da l’acquisiziun d’ulteriurs meds finanzials per realisar il project principal. Sche la fasa da pilot reussescha, vegn inoltrada a GRdigital in’ulteriura dumonda per il project principal.
Dapli capacitads grazia al cussegl spezialisà engrondì
Il post administrativ da GRdigital operescha dapi il schaner 2022. Actualmain evaluescha el las dumondas da promoziun inoltradas e fa in’emprima examinaziun formala. Il post administrativ vegn sustegnì d’in cussegl spezialisà. Lez examinescha, sche las dumondas adempleschan criteris specifics e premissas da l’economia dal martgà e trametta ellas cun ina recumandaziun da promoziun positiva u negativa a la suprastanza ed a la regenza. «A l’entschatta èsi surtut stà difficil da betg surchargiar il cussegl spezialisà da quatter persunas cun in’unda da dumondas», manegia Marcel Meyer, mainafatschenta da GRdigital. Per quest motiv han ins engrondì il cussegl spezialisà mez zercladur. Quel cumpiglia per il mument var 60 persunas engaschadas che derivan da las pli diversas spartas e branschas. Jon Erni, president da GRdigital: «Il cussegl spezialisà è essenzial per cussegliar la suprastanza ed il post administrativ sco era per evaluar las dumondas da promoziun. Igl è fitg positiv che tanta glieud vul s’engaschar (en uffizi d’onur) per la transfurmaziun digitala en il Grischun.»
Ina «pipeline da dumondas» plaina
La prioritad per GRdigital è ussa da dar vinavant a la regenza uschè svelt sco pussaivel ulteriuras dumondas cun ina recumandaziun da promoziun positiva. Da las var 40 dumondas inoltradas sa chatta in terz en il process d’evaluaziun tranter il cussegl spezialisà, la suprastanza e la regenza. Las ulteriuras dumondas vegnan examinadas formalmain u èn vegnidas returnadas cun ulteriurs giavischs a las petentas ed als petents. «La pipeline è plaina, il potenzial da las dumondas è grond. Nus essan persvadids che nus pudain gia prest puspè communitgar bunas novas», sa legra Marcel Meyer, mainafatschenta da GRdigital.
Dretgs dals maletgs: © Fabian Gattlen
Contact per dumondas:
Marcel Meyer
mainafatschenta GRdigital
t +41 81 250 69 11
marcel@grdigital.digital