Communicaziuns 13.08.2026
Project digital per rinforzar l'economia locala e per sustegnair uniuns regiunalas
La «SYL App» è ina plattafurma digitala per rinforzar l'economia locala e per sustegnair uniuns regiunalas. Sco prestaziun principala per il martgà pon las interpresas che sa participeschan communitgar en l'app lur purschidas, reducziuns da pretschs u contribuziuns da sponsoring. Las commembras ed ils commembers da las uniuns affiliadas da sport, da cultura e da temp liber pon lura consultar questas purschidas. Tut tenor la branscha e la marscha datti differents models pussaivels, per exempel ina contribuziun da sponsoring fixa per mintga cumpra, ina contribuziun procentuala a l'uniun ubain ina cumbinaziun cun in avantatg per la clientella.
La clientella en mira èn las uniuns regiunalas d'artisanadi e mastergn sco er autras gruppaziuns da manaschis. L'introducziun per unitads regiunalas pli grondas po numnadamain vegnir fatga en moda effizienta e favuraivla. Cumplementarmain pon er manaschis singuls s'affiliar a la plattafurma. Las interpresas che sa participeschan survegnan in instrument simpel, che po vegnir regulà flexiblamain, per tgirar las relaziuns cun la clientella, per activar la cumpra al lieu e per communitgar acziuns. Il model da fatschenta sa basa sin in simpel sistem d'abunament. Cun extender pass per pass la purschida sin ulteriuras regiuns ed interpresas duai sa sviluppar in manaschi persistent e solid. Cumplementarmain a la funcziun principala èsi pussaivel d'integrar sin la plattafurma servetschs sco novitads, indicaziuns da contact, diever da bons e cudeschaziuns da termins. Uschia digitalisescha e simplifitgescha il project ils process da sponsoring e da communicaziun existents, rinforza la valurisaziun regiunala e sustegna la transfurmaziun digitala en il chantun Grischun.
Infurmaziuns actualas davart il project
Contact per dumondas supplementaras:
Marcel Meyer
Direttore GRdigital
T +41 81 250 69 11
marcel@grdigital.digital